இந்திய அளவில் உயர் கல்வி நிறுவனங்களின் தரவரிசைப் பட்டியலில் சென்னை ஐஐடி மீண்டும் முதலிடம் பிடித்திருக்கிறது.
தேசிய அளவிலான தரவரிசைப்பட்டியலை மத்திய கல்வி அமைச்சகம் கடந்த 2016ம் ஆண்டு முதல் வெளியிட்டு வருகிறது. இந்நிலையில், 2021ஆம் ஆண்டுக்கான சிறந்த கல்வி நிறுவனங்களுக்கான பட்டியலை மத்திய கல்வி அமைச்சர் தர்மேந்திர பிரதான் வெளியிட்டார். இதில், ஒட்டுமொத்தமாக சிறந்தகல்வி நிறுவனங்களின் தரவரிசையில் சென்னை ஐஐடி தொடர்ந்து 3ஆவது ஆண்டாக முதல் இடம் பிடித்து அசத்தியுள்ளது.
அடுத்தபடியாக பெங்களூரு ஐஐஎஸ்சி (2), டெல்லி ஐஐடி (3) இடம் பெற்றுள்ளன. முதல் 100 இடங்களில் வேலூர் விஐடி (21), பாரதியார் பல்கலைக்கழகம் (22), திருச்சி என்ஐடி (23),அண்ணா பல்கலை. (25), சென்னைபல்கலை. (47), அழகப்பா பல்கலை. (57), மதுரை காமராஜர் பல்கலை. (83), பாரதிதாசன் பல்கலை. (90) உள்ளிட்ட 19 தமிழக கல்வி நிறுவனங்கள் இடம்பெற்று உள்ளன.
அண்ணா பல்கலைக்கழகம் தரவரிசையில் 2018ஆம் ஆண்டு10ஆவது இடத்தில் இருந்தது. பின்னர் 2019-ல் 14ஆவது இடம், 2020ல் 20ஆவது இடம் என பின்தங்கி, தற்போது 25ஆவது இடம்பிடித்து பின்னோக்கி சென்றுள்ளது. பொறியியல் பிரிவிலும் 14-வது இடத்தில் இருந்த அண்ணா பல்கலைக்கழகம் 18-வது இடத்துக்கு பின்தங்கியுள்ளது. இந்த பிரிவில் முதல் 200 இடங்களில் 33 தமிழகக் கல்வி நிறுவனங்கள் உள்ளன.
மருத்துவப் பிரிவில் முதல் இடத்தை டெல்லி எய்ம்ஸ், 3ஆவது இடத்தை வேலூர் கிறிஸ்தவ மருத்துவக் கல்லூரியும் (சிஎம்சி) மீண்டும் தக்கவைத்துள்ளன. மெட்ராஸ் மருத்துவக் கல்லூரி 16-வது இடத்துக்கும் (கடந்த ஆண்டு 12), அண்ணாமலை பல்கலைக்கழகம் 35-வது இடத்தில் இருந்து 40-வது இடத்துக்கும் பின்தங்கியுள்ளன. திருநெல்வேலி அரசு மருத்துவக் கல்லூரி முதல்முறையாக பட்டியலில் 48ஆவது இடம் பிடித்து அசத்தியுள்ளது.
சிறந்த கல்லூரிக்கான பிரிவில் முதல் இடத்தை டெல்லியில் உள்ள மிராண்டா ஹவுஸ் பிடித்து அசத்தியுள்ளது. முதல் 100 இடத்தில் லயோலா (3),மாநில கல்லூரி (7), கோவைஅரசு கலைக் கல்லூரி (42), திருப்பூர் அரசு கலைக் கல்லூரி (98)உள்ளிட்ட 33 தமிழக கல்லூரிகள் உள்ளன. பல் மருத்துவம் பிரிவில் தமிழக கல்லூரிகள் முதல் 40 இடங்களில் 7-ம், கட்டிடவியல் பிரிவில் முதல் 25 இடங்களில் நான்கு கல்லூரிகளும் உள்ளன.