கீர்த்தி சுரேஷ் நடிப்பில் உருவாகி வரும் மிஸ் இந்தியா படம் நேரடியாக ஓடிடி தளத்தில் வெளியாக இருக்கிறது.
தமிழ் சினிமாவில் முன்னணி நடிகைகளில் ஒருவராக வளர்ந்து இருப்பவர் நடிகை கீர்த்தி சுரேஷ். மலையாள சினிமாவில் குழந்தை நட்சத்திரமாக அறிமுகமான கீர்த்தி சுரேஷ், தமிழில் இது என்ன மாயம் படத்தின் மூலமாக ஹீரோயினாக அவதாரம் எடுத்தார்.
இந்தப் படத்தைத் தொடர்ந்து ரஜினி முருகன், தொடரி, ரெமோ, பைரவா, தானா சேர்ந்த கூட்டம், சீமராஜா, சாமி ஸ்கொயர், சண்டக்கோழி 2, சர்கார் ஆகிய படங்களில் நடித்து ரசிகர்களிடையே நல்ல வரவேற்பு பெற்றார். இவ்வளவு ஏன், பழம்பெரும் நடிகையான சாவித்ரியின் வாழ்க்கை வரலாற்று படமான நடிகையர் திலகம் படத்தில் நடித்து தேசிய விருதும் பெற்றார்.
அண்மையில், இவரது நடிப்பில் உருவான பென்குயின் படம் வெளியானது. கொரோனா காரணமாக திரையரங்குகள் மூடப்பட்டுள்ள நிலையில், பென்குயின் நேரடியாக ஓடிடி தளமான அமேசான் பிரைம் வீடியோவில் வெளியானது.
தற்போது அடுத்த படமும் நேரடியாக ஓடிடி தளத்தில் வெளியாக இருக்கிறது. ஆம், இயக்குநர் நரேந்திர நாத் இயக்கத்தில் கீர்த்தி சுரேஷ், ஜகபதி பாபு, ராஜேந்திர பிரசாத், நவீன் சந்திரா, கமல் காமராஜூ, சமீர், பானு ஸ்ரீ மெஹ்ரா, சுமந்த் ஷைலேந்திரா, நரேஷ், நதியா ஆகியோர் பலர் நடிப்பில் உருவாகியுள்ள படம் மிஸ் இந்தியா.
தமன் இசையமைத்துள்ள இந்தப் படத்தை ஈஸ்ட் கோஸ்ட் புரோடக்ஷன்ஸ் நிறுவனம் சார்பில் மகேஷ் எஸ் கொனெரு தயாரித்துள்ளார்.
கீர்த்தி சுரேஷின் 20ஆவது படமான மிஸ் இந்தியா கடந்த ஏப்ரல் மாதம் 17 ஆம் தேதி வெளியான இருந்தது. ஆனால், கோவிட் 19 காரணமாக படத்தின் ரிலீஸ் தேதி தள்ளி வைக்கப்பட்டது. தற்போது வரை திரையரங்குகள் திறக்கப்படாத நிலையிலும், எப்போது திரையரங்குகள் திறக்கப்படும் என்று தெரியாத போதிலும் பல படங்களின் ரிலீஸ் தேதி தள்ளி வைக்கப்பட்டுள்ளது.
இந்த நிலையில், தான் கீர்த்தி சுரேஷின் பென்குயின் படம் அமேசான் பிரைம் வீடியோவில் வெளியானது. இதே போன்று மிஸ் இந்தியா படமும் நெட்பிளிக்ஸ் தளத்தில் வெளியாக இருப்பதாக அறிவிக்கப்பட்டுள்ளது. ஆனால், ரிலீஸ் தேதி மட்டும் இதுவரை அறிவிக்கப்படவில்லை. விரைவில் இது குறித்து அதிகாரப்பூர்வ அறிவிப்பு வெளிவரும் என்று எதிர்பார்க்கப்படுகிறது.